ببساطة افهم الدستور

http://dostour2012.radioarabesk.com/

مرور الكرام

هتختاري ايه ؟ نعم ولا لا على الدستور
هختار نعم ؟
ليه ؟
اومال هقول ايه ؟  الناس بتتخانق و فيه دم وكدة فهقول نعم ....


حضرتك  هتقول نعم ولا لا على الدستور ؟
هقول نعم انشالله
ليه ؟ حضرتك قرأته او مقتنع به ؟
آه  قريته ....حلو
طب ايه اكتر حاجة عجبتك فيه ؟
مممم ....هو كويس و الاستاذ صفوت حجازي قال انه ممكن يطبق الشريعة
طب  هو لو الشريعة اتطبقت هتبقي مبسوط ؟
طبعا  انا مسلم  و الشريعة هتحقق لي العدل
الشريعة بتمثل لك العدل ؟
طبعا  ايام سيدنا عمر و سيدنا ابي بكر كان المسلمين  كويسين وعايشين حلو وكان فيه عدالة
     طب مين قالك ان اللي كان موجود ايام سيدنا عمر هيطبق دلوقتي ؟
مش دول الناس اللي بيتكلموا في الدين و اللي تعبوا وشقيوا واتسجنوا عشان بيقولوا دين ؟
هم تعبوا عشان النظام بينكل بمعارضيه كل معارضيه
بس  النظام كان خايف من الحكم الديني وعشان كدة بينكل بيهم
يعني هتصدقهم ؟
طبعا
طب ولو طلعوا كدابين ؟
هلعنهم وهكفر بيهم



حضرتك هتقولي لا ولا اه للدستور ؟
ايه ؟
حضرتك فيه استفتاء على دستور مصر الجديد يوم السبت هتروحي ولا لا وهتقولي ايه ؟
ممممم هروح
هتقولي ايه ؟
هقول  نعم
ليه ؟
اومال اقول ايه ؟ مانا مش عارفة
طب ولو مش عارفة ماتسالي لكن نعم ليه طالما مش عارفة
عشان اصلا محدش بينفذ لا قانون ولا دستور يعني ال نعم بتاعتي اللي هتغير  ولا هتعدل ؟
طب ما تعملي اللي عليكي
هو فيه حد في البلد بيعمل اللي عليه
اعملي انت
محدش عمل اللي عليه معايا , لا الرئيس بيعمل اللي عليه  ولا المعارضة بتعمل اللي عليها ولا الثوار بيعملوا ولا اللي بيتكلموا في التلفزيون بيعملوا اللي عليهم انا كمان مش هعمل اللي علية ............ز



حضرتك هتقولي لا ولا اه للدستور ؟
هو مش عاجبني كله بس هقول نعم
ليه ؟
ماهو مفيش حاجة هتعجب الناس كلها  اذا كان البيت مبيتفقش فيه حد على برنامج نتفرج عليه يبقي الدستور هيتفقوا عليه ؟
الدساتير بتتعمل بالاتفاق كل واحد يقول نفسه في ايه ويتكتب بحيث يحوز على الاعجاب الكلي
فيه صياغة ممكن ترضي الافراد كلها بس لو اللجنة اللي بتعمل بتنفذ السياسة دي اصلا
ازاي ؟ يعني نطبخ كوسة ولا ملوخية ؟
نطبخ الاتنين
ولو مفيش امكانية
نقول اننا ملتزمين بطبيخ الاتنين وبعدين الامكانيات دي نشتغل عليها بعدين
بس فيه دساتير كتير اوي اتعملت ومتنفذتش
دي قصة تانية لكن الخطوة دي نعملها صح ولا نهملها عشان فيه اخطاء بتحصل
ممممم ....هشوف كدة

هذه كانت الحوارات التي أقمتها و استخلصت  منها  أن ثقافة الشعب تقف  دائما وراء قدرته وايمانه بأراءه من عدمه
وان التجارب السيئة والخبرات السياسية السيئة تتحكم في ثقة الشعب في تحقيق العدالة
سنوات الطغيان الطويلة والمعضلات تخلق شعبا خائر القوي يخشي المقاومة ولا يقوي عليها ولو معنويا
فالزوجة التي عانت كثيرا من انحيازات المجتمع للرجل يتم نصحها بال نعم ايمانا واحتسابا تارة و انحناءا للعواصف الزوجية و
و في المشاجرات يحدث اساءات بالغة ثم يحدث التسامح بكلام  كالبنج
اهدوا - صلوا عالنبي - محصلش حاجة انتوا اخوات
والحاصل فعليا ان الاتهامات والاهانات بالغة السوء ولا يمكن مرورها مر الكرام
فكيف يهدأ كل طرف هكذا دون التوقف عند ما قيل ؟ هل هذه هي الطيبة ؟
هل هذه هي الطبيعة المسالمة للمصريين ؟
كيف يعود الرجل لزوجته بعد ضربها او تجريحها واهاناتها او خلافات متصاعدة ؟
كيف يتنازل المصريين عن حقوقهم عموما بعد تصعيدها بشكل كبير جدا ؟؟؟
تنزل الخلافات على لا شىء .... فهل كان الغرض التصعيد فقط من اجل التصعيد ؟ ام ان التنفيس فقط في التشاجر فقط لاغير
ام التعبير عن الغضب هو الغاية لا اكثر
حينما ثرنا صارت موجات من الجنوح للسلم تتصاعد بين قطاعات الجماهير المصرية
استثمرها البعض و طالب بها العديد صدقا
لكن ............... هل سنظل هكذا ؟؟
نجنح للحائط ...ونمر امام  احداث كثيرة مرور الكراااااااااام ؟