البكر ....الرشيييييد

جيمي : ازيك يا انكل عامل ايه ؟ واحشني

صفصف : ايه اللي فكرك بيه وانت من امتي بتودني اصلا , الله يرحم ايام زمان لما كنت بتلف عشان تشيلني من مكاني...

جيمي : لا يا انكل عيب , انا مستغناش عنك و انت فضلك عليينا كبير و انت صديق بابا المخلص...

صفصف : ( يضحك ضحكته القميئة ) : عموما من غير ما تتكلم , انا باخد بكرامة ابوك وبدأت فعلا...

جيمي : يضحك مندهشا وكأنه وجد كنزا دفينا , وانا اللي كنت هاخد رايك نعمل ايه وازاي ننتقم او حتى نهدم الزفت الثورة دي , عايز السوس ينخر فيها يا انكل .... احنا كلنا في مهانة وبابا مبقاش زي الاول ولا ماما..

صفصف : لا لا لا متقلقش , انا شغال والف من يخدم , الثورة اصل لها اعداء ....

جيمي : طب نعمل ايه ونبتدي ازاي ؟

صفصف : بص , العيال دي صغيرين ومتحمسين واي شرارة صغيرة وفتنة صغيرة تترمي هيجروا عليها ....ومتنساش دول اصلا مش جاهزين للديموقراطية , معقول هينظموا نفسهم بالسرعة دي؟ ومتنساش انا جات لي معلومات ان فيه معارضين للثورة وعايزين نخليهم يفضلوا معارضين

جيمي : على فكرة المعارضين للثورة بيخافوا يبينوا انهم معارضين...

صفصف : هايل !!!! عشان يفضلوا ينتقدوا في الثورة و يكسروا مجاديفها وتحصل الانقسام والانقسامات والفتن دي احسن اختراع للسيادة...

جيمي : بس دول ممكن يتلموا في ثانية يا انكل , ومنهم ناس واعية بدليل الثورة نفسها ,

صفصف : وماله ؟ برده نفضل وراهم بالانقسامات و الفتن , شفت مشهد يوم الجمعة لما الجدع الشيخ القرضاوي دة طلع وخطب وسط الناس والناس بتصلي وكدة ....اهم هم اللي جابوه و احنا لسة محطناش ايدينا بالكامل والموقف خلق انقسام ازاي , زائد رجالتنا عالفيس بوك بيناقشوا المادة التانية زائد ان المسيحيين هيخافوا لان البديل لمبارك عندهم هم .....البعبع

جيمي : مممممم والخطوة الجاية ...

صفصف : ادينا بعتنا الواد اللي قتل القسيس بتاع اسيوط دة وكأنه بيسرقه , وربنا يسهل ونهوي عالنار...

جيمي :الطائفية هي الحل ولو ان امريكا باعتنا يا انكل حتى لو فيه قلق عالمسيحيين مش هتسال...

صفصف : احنا عايزين الثورة تتكره مبدئيا , وبعدين هي امريكا قاعدة مراقبة ومستنية ولو فيه مصلحة هتتدخل ولو لاح ليها حكم سلفي او اخواني هتستعد...

جيمي : ماما بتقول ميتأمنوش اصلا الامريكان بعد اللي عملوه في بابا...

صفصف : محدش هيآمن ليهم , لكن هي مصالح زي ما هم بيتعاملوا...ههههههههههههههه

متشغلش بالك , شوية بشوية هنرسخ لمفهوم اعداء الوطن والثورة زي ايام 52 كنت انت صغير , يااااه يا جيمي يابني ياما دقت عالراس طبول ....متقلقش...

بابا عامل ايه ؟

جيمي : مكتئب ومش بيكلمني , حضرتك قولي هو عامل ايه ...

صفصف : حايله وتقرب منه يا جيمي ....متخليهوش يزعل منك..

جيمي : ميرسي اوي يا انكل , ربنا يخليك لينا...

لاتزال الثورة في طورها الاول , كفتاة عذراء نقية , لا تجعلوها تصدق كل من ارتدي زي الصدق , حافظوا عليها ....فهي كنز ثمين...

اجعلوها بكر ....رشيد

بعد القطفة الاولي لاحلي ثمار الثورة , اللهم اجعل ثمارها خيرا وفيرا...